因為之前有兩堆影左唔記得寫～
所以大家睇多少少字！！
都係簡單分享,懶懶唔詳寫了！！
KATE 洗甲水
未用過呢支洗甲水之前,一直去買sasa 卓悅門口細細支十幾蚊果Ｄ〜
無咩固定用邊隻, 甚麼花香味果味，都係好求其！
之後越來越貴, 又多留意美甲blog，之後發現呢支平靚正好物〜
有時去貨架都會沽清, 証明都係多人用〜
一來價錢平,二來大大支有排用, 而且抹甲油好乾淨！！
回購: 100%
法國Bio Secure潔面啫喱 $68 200ml
之前蜂買團購左兩支,
天然有機蘆薈及堅果油成份, 無香料、無肥皂，超溫和不刺激
獲歐盟ECOCERT認證98.3%有機天然成分
真係唔出名的牌子, 不過好抵用, 用左我三個月先用完一支！
泡泡唔好,有少少天然香味，洗完唔乾,夏天用可洗走面油！
回購: 0% (唔知邊度可以買？？)
O'slee 高效保濕精華
我未用過呢個牌子的精華, 我見有團購先入手試下！
質地好水，保濕力一般，百幾蚊我會買dream skin囉！！
回購: 0%
SUNKILLER BB納米防曬乳液
夏天的試用，用左好耐！！仲有四分一，唔適合放咁耐！
本身有防晒功能, 加上有色, 可以均勻膚色!!
面上的紅印都稍為遮到,又好自然!!
如果平時趕出門口返工, 或閒時出街要好面色,
唯一唔好就係易漏, 放入手袋不得了！！
回購: 0% 囤左起碼十支未開黎用,唔買住〜
Clinelle 舒緩爽膚水
爽膚水係我用得最快的護膚品第二名，
呢支係特價時入手,就快過期,所以平到$40支！！
配合化妝棉用，唔覺特別補濕，陣味麻麻地
不過用左成個月無爆過瘡瘡〜又唔拿眼！
回購: 30%
Clinelle 深層潔膚露
佢係透明啫喱狀，有花香味〜
泡泡唔多，用潔面棉會好Ｄ！！
三星期比我用晒！
都係呢特價時入手,就快過期,所以平到$40支！！
回購: 50%
Ｏlay高效透白精華
一向都係olay用家, 呢支第一次用！
美白效果明顯, 又唔乾，一支用到兩個月〜
質地軟滑偏液體,少少就可以推全面！
百幾蚊貨又唔算貴, 不過香味有點重＠＠
好似有人覺得太厚太潤！
回購: 100% 夏天會再回購
O'slee 天然玫瑰果爽膚水
同高效保濕精華一set團購返黎！
第五代新版本，保濕力強左，好香玫瑰果味！
我多數用黎溝面膜粉,或者toner mask咁用！
玻璃樽唔好,太重,又唔環保，容量唔多,好快用晒！
回購: 20﹪
深層導入保濕精華
L'Oreal Hydrafresh Deep Boosting Essence
精華蘊含三重 Hyaluronic Acid 透明質酸導入科技
能深入滲透至第5層肌膚, 令肌膚全天侯保持清新水潤
直接萃取自法國孚日山純淨 SPA 礦泉水
富含多種礦物質, 有效激發肌膚天然鎖水能力
蘊含維他命 E 高濃度微粒, 維他命 E 具有抗氧化功效
新出果時就買左，用左大約一個半月！
呢個似係用舊包裝,換新產品，
比平時的皇牌補濕精華多左啲綠色粒粒,應該都係保濕因子！
質地香左少少, 補濕效果幾好！唔會得個水字,搽上面就話乾～
有丁丁潤，我覺得同皇牌保濕精華霜有得比！
回購: 70﹪
FORMULA 10.0.6 PORES BE PURE SKIN CLARIFYING MUD MASK
10.0.6淨透方程式毛孔淨化抗痘調理面膜
含水楊酸成分，能徹底調理痘痘粉刺，預防面皰；草莓萃取，富含天然中性的果酸成分，能溫和去除老廢角質，潔淨肌膚，減少粉刺及髒汙；蓍草，能清涼並舒緩肌膚的草本植物，細緻毛孔。
呢支買左好耐，當佢撤出貨架時特價入手，當時呢個牌子有搞試用而且好多人評價唔錯先買黎試下！！
佢係一隻清潔面膜，我自己皮膚薄，唔太多磨砂,所以間中用清潔面膜！
用過咁多隻..呢隻係痴線嘅....
首先陣味好勁，唔係花香味,係草莓果香味，不過...
我初時用恨恨地厚敷，三分鐘後..洗左..實在太嗱..疼到..嗱到我塊面紅左!!即時搽返蘆薈gel降溫...
死唔住邪第二次5分鐘. 照嗱....
佢仲寫住10-15分鐘...澳洲人面皮厚Ｄ??
係咪我塊面面皮薄先咁 ？？我妹用一次就比返我...= =
潔力太強大??? 100ml 用左五次...好浪費..好彩唔貴！！
回購: 0﹪
霸王養髮精華素
屋企一直都有用霸王洗頭水，呢支都叫係髮膜！
見佢平平地就試下，有淡淡藥材味！
但滋潤度唔夠VS, DOVE勁～無果種滑滑feel~
回購: 30﹪
FASIO 眼影GD-1 金色系華麗印象的宮廷璨金 $108
兩年前的試用活動的眼影, 一直keep住有用～
金色果格見底了. 啡色果格用到乾塘！
配色方便唔錯, 閃粉果格好閃好靚～
回購: 0﹪ 眼影不回購啦,會試同牌新品！
Dejavu Fiberwig 超級放肆驚艷超長型睫毛膏
因為試用活動認識呢個產品，從此大愛！
效果幾好,唔會誇張,好自然~
最重要係用後根根分明，八小時無溶過～
落妝係纖維咁落條條咁～
暫未搵到比佢更好用的！！
回購: 100﹪
kiehl's lip gloss
一直係化妝袋的妝物,斷斷續續用左三年!!
15ml..超大容量..只係百幾蚊！！
好用,質地滑,閃閃地，夠潤唔油,有果香味～
功能性大過觀賞性！！
回購: 50﹪
heroine make強效眼部卸妝液
桃紅色樽身偏硬, 唔可以"吱"出黎！要chock出黎！
份量都幾易控制！ 質地幾清爽唔會油立立咁！
基本上都落得幾好, 不過卸妝能力相比我使用中的落妝液較低
回購: 0﹪
呼！！寫完一大堆了！！
喜歡這篇文 就請推一推 支持下啦！感謝～
沒有留言:
張貼留言