AMAN AREA: 妝品分享★★鐡片君你好!!!★★HitPan

最近網上睇過一篇分享, 識左一個詞語「hitpan」~
所謂的「hitpan」化妝品就是用到見底的化妝品，
是韓國美妝界的流行用語之一，也是好用產品的一大指標!!!
對我黎講, 用到見底未必真好好用, 有時只係唔想浪費, 哈哈哈哈~
咁我睇返自己正在用的化妝品, 其實都有幾件見到鐡片君 (你好嗎?)
咁就分享下啦, 有啲真係好好用, 有啲我又覺得一般般!!!

幾件都唔係好難買~一件件講下啦!!! GOGOGO~

1028太妃眼影組, 朋友在台灣代購入的, 當時買入SET裝, 有埋眼線筆及落妝!
1028呢個台灣牌子有出好多潔膚產品, 我用過三款都覺得唔錯, 去台灣必買的品牌之一

鐡盒設計唔錯, 圖案都好靚, 一盒有六色, 每格都好大粒,
不過佢太浪費位置, 所以我拆左去變成組合~XD
有KATE眉粉組 + Kanebo Coffret胭脂
呢隻眉粉用左好耐,經己見底了, KATE眉粉組出名好用,
可以打鼻影又可以畫眉, 色調自然又持久, 不過用耐左會結塊, 要成日刮,
慢慢就只用黎打鼻影無用黎畫眉喇~
胭脂都見到用到有個鐵片型, 我諗用多一個月就可能見到太陽了~XDD
見底的兩粒眼影基本上返工都用佢, 一星期最少用4次,
連續高密度咁用大約半年, 就見底了, 其實佢好大餅但唔深~

平時我都係用呢2色去配撘使用,
簡單就可以畫個眼妝, 用掃, 手指, 棉棒都可以!!
有微閃, 但唔會浮誇, 不過如果用掃上會飛粉~
用手指或者棉棒都無呢個問題, 持久力唔錯, 返工放工都完全KEEP到!!!
呢盒眼影我評價唔錯, 想買盒耐用又好用, 價錢又平的可以考慮1028,
而且仲有其他系配色, 學生哥首選!!!! ★★★★★

第二件都係1028的妝物, 雙色遮瑕膏
佢呢盒係我用的遮瑕入面使用度最高, 亦最好用~
我叫佢做Bobbi Brown 平民版~

一盒有兩種色, 橙調及黃調,
橙調用黎遮眼底或紅印, 黃調用黎遮面部色斑或打亮~
何解我覺得好用, 因為我開左用過兩三次, 放埋一邊,
放左over半年再拿出黎用, 佢質地依然都好潤好cream~
完全唔會乾裂, 真係超CRAZY!!

講到遮瑕度我覺得好足夠, 落妝粉底, 再加少少遮瑕,
起碼遮到8成之餘仲要唔乾, 因為好潤, 所以我用指印開就得!!!
我未用過貴婦品牌的遮瑕, 無得太多的比較,
但我少用遮瑕, 都可以用到見底, 咁佢真係好好用~
好多水貨店都有賣架~

Too Cool For School Lunch Box Set~
我係韓國旅行時入手的, 呢盒真係幾抵用,
而且質素都唔錯, 佢眉粉的份量比KATE厚又大粒,
基本上我唔返工都會畫眉, 所以真係日日要用~

上層係雙色眉粉, 下層係眼線膏,
有兩種色灰色調同啡色調, 我買啡色所以連底層的眼線膏都係啡色~
眉粉我發覺佢出色度好高, 前半段我用淺色, 眉尾同深色,
所以畫出黎好自然, 因為我有加top 所以唔知佢防唔防水~
下層眼線膏質素唔差, 可以全日不脫色, 死死咁貼住眼皮,
不過缺點係比較濕, 無咁快乾, 啡色得黎帶銀閃, 畫出黎好靚,
質地軟身, 好易上手~佢結塊情況無KATE咁大, 所以我會KEEP住用~

Rimmel Stay matte pressed powder 細致毛孔啞光控油定妝粉餅
呢餅嘢我買左大約4個月左右, 買左返就開黎用,
基本上一星期用三至四次, 好快就見到底了,
控油力我覺得一般, 無網上講到咁好用,
外國BLOGGER就讚多, 可能唔岩香港天氣呱~
春天用都可接受, 下午會泛油, 佢算透明色, 不過不宜掃太多層, 會好粉樣~
缺點就係佢個膠蓋, 設計非常之差, 差基本用兩個月,
日日開關, 個膠蓋就會裂~
如果你係油到煎蛋咁, 就一定唔岩你用, 混合肌就可以~
價錢好平, IG或水貨店都只係$60, 仲有13g咁大餅,
唔包粉撲係要自己用掃囉~我習慣用掃所以我唔覺有咩煩!!!

植村秀 lightbulb UV 白瓷光感粉餅
試用產品, 放埋左一邊一段時間, 最近擺出黎用返!!

日本品牌的粉餅都係偏色, 有時偏黃偏有時偏紅,
所以我好少用日版的, 有時買最淺色都有少少黃,
當然BA比錯色我, 呢隻#574偏紅左, 所以我好少用,
不過唔用又好浪費咁, 所以間中會用下,
而且佢個雙面粉樸設計真係好好, 質地方面係好好粉素好幼細,
夠貼唔會卡粉, 補妝都好方便, 但持久度都係一般, 中午就已經泛油浮粉,
佢岩中至乾性皮膚用, 同系粉底液我都有用, 不過都係錯色, 唉~~

大致上分享咁多, 多謝收看~
記得前去我的面書專頁 / IG啊, 有更多小小分享唷~~

本文章所發表的全部內容均屬個人意見及感受，並不代表該品牌之言論及立場。
如希望獲得更多有關產品資訊請自行聯絡該品牌查詢。